ثوانى

شوف بقى قالت ثوانى
وانت لسه هتبدى كان عمر تانى
عمر فارد كل بوحه
شال جروحه من بعيد نطقت ثوانى
بس عدى الوقت جارك
لما كان شايف نيرانك
حمله اتقل من سنين غربه نادانى
بعد مانطقت ثوانى
ابتديت تعرف ساعتها
كل فرحه هناك ساعتها
ابتدت وياك تضيق والبراح فارق كيانى
بعد مانطقت ثوانى
لسه وردة كات هتفتح
من حنينها ف كل مطرح
شوك فراقها لقيته زهر غرق الدنيا ومكانى
بعد مانطقت ثوانى
النهار واهى شمسه غابت
من ساعتها وهى سابت
دمعتين على خد وردك محفورين ويا الامانى
بعد مانطقت ثوانى
مررت كل اللى فاتنا
خلت الشمعه ف رفاتنا
تبكى ضلمه واحنا تهنا ف الطريق الاولانى
بعد مانطقت ثوانى
وانت لسه هتبتدى كان عمر تانى

اسفة

جايه فاردة الكون ف ايدها وانت تجرى قصادها
طلعت كلمه منها زى طلقة وجات ف قلبك
واترمى يعرف حدودك كل صمتك
مفتاحين على باب حنانك سبتهم للكون معاك
سبت قلب هناك بيعرف لون كلامك
رددت بحروف كلامها
لونت بيها آلامها وابتديت وياها تعرف لون فراقها وهى عارفه
ان قلبك مش ف إيدك
لما يجرى دمها ويكون وريدك
او كلام يطلع لحرف يكون وليدك لسه خايفه
تعرفى منى حقيقتى
او يقول دمعك حكايتى
او تطير الكلمه من بين الشفايف تسمعى وتردى شايفه
كنتى فرحة ف ليله عدت
ابتدت تعرف وفردت
شمس ليله قمرها غاب ساعة ماردت
قلب فاتح باب حياته وهى نبضه زى شجره حزينه واقفه
سبتى فرحه هناك تقولك
ع البيبان راحت تدلك
ايه بقى هايكون فاضلك غير حروف نطقتها روحك وانتى روح لحنانها آسفه

بياع قلوب

بياع قلوب
بياع وجع
خايف عليا هناك لا ادوب
وارجع هنا
ويا الودع
وشوش وقول كل اللى راح
احكى لى على طعم الجراح
خلينى باب
وادخل يادوب
هتلاقى جوايا حروف مليانه م الخوف والفزع
بياع قلوب
بياع وجع

أنــــــــا الشرير بتاع الورد

اخش ورودك اقطفها وابيع منها لكل مشاعرى بالجمله
واكتب لك عن الغيبه وافتح بكره للاحلام
تعيشى قصة من وهمى
وتاخدى حجتى حرفين
ابوح بيهم
لأول مرة بانطقهم
واحس كمان بالوانهم
تفرحنى عنيكى ساعات
وطارحه رموشك الضحكة اكملها بكام تسبيله من عندى
عشان تردى اخش حروفك اسمعها
واعيش بيها
تقرب كل اشياءك قوى منى
تقربلى
واقرب منها والاقانى
اقول تانى
ماينفعش
تكونى قصادى بحروفك وماانطقكيش
ماينفعش
واول كلمه من طرف اللسان انتى
واخر حرف يرسمنى معاك مافيش
هاقولك ايه
حروفى تطل ع السكة
وافتكر القساوة صحيح
واتسرسب
معاك واتوه
وبارجع بس وف ايدى
حكاوي نقولها للدنيا
حكاوى نعيشها لحظتها
وبتعيشنا
واشوف نفسى وانا الشرير
بيقطف منك الحرفين
ويخطفهم
ويطلع دوغرى ويبيعهم
لاول صفحة مفتوحه
يقول دى ورود
يقول افكار
يقول اشعار
ماتفرقشى
يلاقى نفسه وبصورة بعيد خالص عن الأول
حروف آهه
ومنطوقه من الوجدان
وهو نفسه كان وردة
وقطفتها
ف أول حرف نطقت بيه